యూకే కొత్త ప్రధాని ఆండీ బర్నామ్: ప్రజలకు తెలియని విషయాలు

న్యూ ఢిల్లీ, భారతదేశం 18, జులై 2026 ALN: ప్రజల నిశిత పరీక్షను ఎదుర్కోకుండానే ఆండీ బర్నామ్‌లా ప్రధాని పదవిని అధిష్ఠించిన వారు ఇటీవల కాలంలో అరుదు.

ఎందుకంటే చివరకు అధికార లేబర్ పార్టీ నాయకత్వ ఎన్నికలు నిర్వహించకుండా, ఏకగ్రీవ ఎంపికకే మొగ్గు చూపడంతో ఆండీ బర్నామ్ విధానాలు ఎలా ఉంటాయి, పాలనా శైలి ఎలా ఉంటుందనే అంశాలపై పెద్దగా చర్చ జరగలేదు.

దీనివల్ల ఒకవైపు పార్టీలో బహిరంగ విభేదాలు తలెత్తకుండా చూడటం పైకి కనిపించే ప్రయోజనమైతే, మరోవైపు కొత్త నాయకుడిగా, కాబోయే ప్రధానిగా బర్నామ్ సామర్థ్యాన్ని ముందుగానే పరీక్షించే అవకాశం లేకపోవడం లోటుగా మిగిలింది.

అయితే త్వరలోనే బర్నామ్ ఎలాంటి ప్రధానిగా నిలవనున్నారనే సమాధానం లభిస్తుంది. ఆయన గత పదేళ్లుగా గ్రేటర్ మాంచెస్టర్ మేయర్‌గా పనిచేస్తున్న ప్రాంతాన్ని మినహాయిస్తే, మిగిలిన ప్రాంతాలలో బర్నామ్ గురించి పెద్దగా తెలియదనే విషయాన్ని గుర్తుంచుకోవాలి.

అందుకే ఇప్పుడు ఆయన గురించి తెలుసుకునే ప్రయాణం చాలామందికి కొత్తగానే మొదలుకానుంది.

బర్నామ్ గురించి తెలిసిన విషయాల విషయానికి వస్తే ఆయనలో రెండు కోణాలు కనిపిస్తాయి. వాటిల్లో ఒకటి వ్యవస్థకు వెలుపలి వ్యక్తి, రెండోది వ్యవస్థలో భాగమైన వ్యక్తి.

అయితే ఇప్పుడున్న చాలా మంది రాజకీయ నాయకుల్లానే ఆయన కూడా మొదటి కోణానికే ఎక్కువ ప్రాధాన్యం ఇస్తారు.

ఉత్తర ఇంగ్లండ్‌లో శ్రామికవర్గ కుటుంబంలో పెరగడం ఆయనను వ్యవస్థకు వెలుపలి వ్యక్తిగా నిలబెడితే, ప్రతిష్ఠాత్మక కేంబ్రిడ్జ్ విశ్వవిద్యాలయంలో చదివిన అనంతరం టోనీ బ్లెయిర్, గోర్డన్ బ్రౌన్ నేతృత్వంలోని న్యూ లేబర్ ప్రభుత్వాల హయాంలో ప్రతిభావంతుడైన యువ నాయకుడిగా వేగంగా ఎదగడం, ఆయనను వ్యవస్థలో భాగమైన వ్యక్తిగా నిలుపుతోంది.

వ్యక్తిత్వ పరంగా చూస్తే బర్నామ్ ఓ సాధారణ వ్యక్తిలా ఉండటానికి, సామాన్యులు కూడా తమతో పోల్చుకునేలా ఉండటానికి ఇష్టపడతారు. ఆయనకు బీర్, ఫిష్, చిప్స్ అంటే ప్రీతి. ఫుట్‌బాల్, సంగీతం గురించి మాట్లాడటం ఎంతో ఇష్టం. ఇటీవలి కాలంలోని చాలా మంది రాజకీయ నాయకులతో పోలిస్తే ఆయన మరింత ట్రెండీగా కనిపిస్తారు.

రాజకీయ భావజాలం విషయానికి వస్తే, 1980లలో మార్గరెట్ థాచర్ నేతృత్వంలోని సంప్రదాయ ప్రభుత్వాలు అమలు చేసిన ప్రైవేటీకరణ, ఆర్థిక సరళీకరణ విధానాలపై యవ్వనంలోనే తనకు వ్యతిరేక భావాలు ఏర్పడ్డాయని బర్నామ్ చెబుతారు. తాను పెరిగిన ఉత్తర ఇంగ్లండ్‌లో పారిశ్రామిక రంగం క్షీణించడానికి, ప్రజల్లో నిరాశ పెరగడానికి ఆ ప్రభుత్వాలే కారణమని ఆయన అంటారు.

కానీ, ఇప్పుడు ఆయన తాను మధ్యేవాద వామపక్ష వాదినని బేషరతుగా చెబుతుంటారు.

యూరప్‌లోని చాలా మంది వామపక్ష నాయకుల్లాగే బర్నామ్ కూడా ప్రభుత్వ వ్యవస్థను ఒక సానుకూల శక్తిగా భావిస్తారు. సమాజంలో ఆర్థికంగా వెనుకబడిన వర్గాల సంక్షేమంపైనే ఆయన ప్రధానంగా దృష్టి సారిస్తారు.

గడిచిన 40 ఏళ్లుగా కొత్త ఉదారవాద ఆర్థిక విధానాలు సామాన్య ప్రజల జీవితాలను మెరుగుపరచలేకపోయాయని ఆయన తరచూ విమర్శిస్తుంటారు.

అయితే అలా అనడంలో ఆయన ఉద్దేశమేంటో స్పష్టంగా చెప్పడం కష్టం. ఆయన ఎప్పుడూ సీరియస్ భావజాల రాజకీయాలకు కట్టుబడి ఉన్నట్లు గానీ, విధానాల సూక్ష్మాంశాలపై ప్రత్యేక ఆసక్తి చూపినట్లు గానీ కనిపించలేదు.

బ్రిటన్ విదేశాంగ లేదా దేశ అంతర్గత విధానాల్లో బర్నామ్ విప్లవాత్మక మార్పులు తీసుకొస్తారా? దీనికి సమాధానం ఇప్పటికైతే ఎవరికీ తెలియదు. ఎందుకంటే ఈ అంశాలపై ఆయన చాలా తక్కువగా మాట్లాడారు.

దేశ అంతర్గత విధానాల విషయంలో ఆయనకు అనేక ఆటంకాలు ఉన్నాయి. ప్రస్తుతం బ్రిటన్ తక్కువ ఆర్థిక వృద్ధి, ఎక్కువ అప్పులతో సతమతమవుతున్న దేశం. ప్రభుత్వ వ్యయం, పన్నుల స్థాయిలు ఇప్పటికే చరిత్రలో ఎన్నడూ లేనంత స్థాయికి చేరుకున్నాయి.

అందువల్ల ప్రభుత్వ మరింత జోక్యం చేసుకోవాలని లేబర్ పార్టీ, వామపక్ష వర్గాలు కోరుకున్నప్పటికీ, దాన్ని అమలు చేయడం అంత సులభం కాదు. గత ఎన్నికల్లో పన్నులు ఎక్కువ పెంచమని, అదుపు లేకుండా అప్పులు తీసుకోమని లేబర్ పార్టీ ఇచ్చిన హామీ కూడా బర్నామ్ ప్రభుత్వానికి సవాలుగా మారనుంది.

లేబర్ పార్టీ నాయకుడిగా ఎన్నికైన తర్వాత బర్నామ్ స్పష్టంగా ప్రస్తావించిన ప్రధానాంశం, ప్రాంతీయ అధికార వికేంద్రీకరణ. లండన్ నుంచి ఇతర ప్రాంతాలకు అధికారాలు, నిధులు బదిలీ చేయాలని ఆయన ప్రతిపాదించారు. అయితే ఆ ప్రతిపాదన ఇప్పటికీ స్పష్టమైన రూపు దాల్చలేదు.

విదేశాంగ విధానం విషయానికి వస్తే, ఈ అంశంపై తన రాజకీయ జీవితమంతటిలో బర్నామ్ పెద్దగా మాట్లాడలేదు. అందువల్ల మార్పుల కంటే కొనసాగింపే ఎక్కువగా కనిపించే అవకాశముంది.

విదేశాంగ విధానాన్ని పార్టీ రాజకీయాలు లేదా నాయకుడి వ్యక్తిగత అభిప్రాయాల కంటే భౌగోళిక పరిస్థితులు, చరిత్ర, జాతీయ ప్రయోజనాలు, అంతర్జాతీయ పరిణామాలే ఎక్కువగా ప్రభావితం చేస్తాయి. కాబట్టి ఇలాంటి కొనసాగింపు ఆశ్చర్యకరమేమి కాదు.

అందువల్ల సర్ కీర్ స్టార్మర్ మాదిరిగానే బర్నామ్ కూడా యూరోపియన్ యూనియన్‌తో మరింత సన్నిహిత సంబంధాలను కొనసాగించేందుకు ప్రయత్నిస్తారు. అయితే ఆ సాన్నిహిత్యం పరిమితులకు లోబడి ఉంటుంది. అలాగే న్యాయపాలన, అంతర్జాతీయ ప్రమాణాలు, ఐక్యరాజ్యసమితి వంటి సంస్థలకు బ్రిటన్ ఇచ్చే ప్రాధాన్యాన్ని ఆయన కొనసాగిస్తారు.

అమెరికాతో బ్రిటన్‌కు ఉన్న ప్రత్యేక సంబంధాలను కూడా కొనసాగించేందుకు ఆయన ప్రయత్నిస్తారు. అయితే అది అమెరికా అధ్యక్షుడు డోనల్డ్ ట్రంప్‌తో వ్యక్తిగత సాన్నిహిత్యాన్ని సూచిస్తుందా అంటే, తప్పనిసరిగా కాదనే చెప్పుకోవాలి. అయినప్పటికీ ఆయన ఆ దిశగా ప్రయత్నించే అవకాశముంది.

పదేళ్లలో బ్రిటన్‌కు ఏడో ప్రధానమంత్రిగా బాధ్యతలు చేపట్టనున్న బర్నామ్ ముందున్న సవాలు చిన్నది కాదు. ఇంత తక్కువ కాలంలో ఇంత మంది ప్రధానులు మారిన విషయమే ఆయన అధిరోహించాల్సిన శిఖరం ఎంత ఎత్తులో ఉందో తెలియజేస్తోంది. అయినప్పటికీ ఆయనకు శుభవార్త, చెడు వార్త రెండూ ఉన్నాయి.

చెడ్డ వార్త ఏంటంటే ఆయనకు ముందు ఎన్నికైన ఆరుగురు ప్రధానమంత్రులను కుదేలు చేసిన ఆర్థిక, సామాజిక సవాళ్లు ఇప్పటికీ అలాగే ఉన్నాయి.

ఇక బర్నామ్‌కు శుభవార్త ఏంటంటే సంప్రదాయ పార్టీల ఆధిపత్యానికి సవాలు విసురుతున్న గ్రీన్స్, రీఫార్మ్ వంటి లెఫ్టిస్ట్, రైటిస్ట్ పార్టీల ప్రజాకర్షణ బహుశా గరిష్ఠ స్థాయిని చేరిందేమో. కానీ ఇదిప్పటిదాకా ఊహాగానం మాత్రమే.

మొత్తానికి బర్నామ్ ఎలాంటి నాయకుడనే విషయంపై ఇంకా స్పష్టత లేదు. అయితే కొందరు భయపడుతున్నట్టు ఆయన సంక్షోభ సమయంలో దేశాన్ని నడిపించే స్థాయి నాయకుడు కాదా, లేక లేబర్ ఎంపీలు భావిస్తున్నట్టు త్వరలోనే సమర్థ రాజనీతిజ్ఞుడిగా ఎదగబోయే నాయకుడా?

(బీబీసీ కోసం కలెక్టివ్ న్యూస్‌రూమ్ ప్రచురణ)