అమెరికా-కెనడా వాణిజ్య యుద్ధం: ట్రంప్ ధోరణి మరియు కెనడా ప్రతిస్పందన

న్యూ ఢిల్లీ, భారతదేశం 26, ఆగ 2026 ALN: అమెరికా అధ్యక్షుడు ట్రంప్ వైఖరికి విసిగి వేసారి వాణిజ్య చర్చల నుంచి కెనడా చివరి నిమిషంలో వైదొలగడంతో ఇరుదేశాల మధ్య మొదలైన వాణిజ్య యుద్ధం క్రమంగా ముదురుపాకాన పడుతోంది. తమ దేశానికి కెనడా నుంచి దిగుమతి అయ్యే 20వేల కోట్ల రూపాయల విలువైన వస్తువులపై 50 శాతం సుంకాలు విధిస్తున్నట్లు ట్రంప్ తాజాగా ప్రకటించడంతో కెనడా డాలర్ విలువ అకస్మాత్తుగా పతనమైంది. దీంతో డాలర్‌కు డాలర్‌తో జవాబిచ్చేందుకు కెనడా కూడా సిద్ధమవుతోంది. అమెరికా నుంచి దిగుమతి అయ్యే వస్తువులపై సెప్టెంబర్ 8 నుంచి తాము కూడా ప్రతీకార సుంకాలు విధించనున్నట్లు కెనడా ప్రధాని ఇప్పటికే ప్రకటించారు.

రెండోసారి అధ్యక్ష పదవి చేపట్టాక ట్రంప్ కెనడాతో కయ్యానికి కాలు దువ్వుతున్నారు. ఆ దేశాన్ని తమ 51వ రాష్ట్రంగా చేసుకోవాలనేది ఆయన చిరకాల వాంఛ. ఆ విషయాన్ని ఆయన పలు సందర్భాల్లో బయటపెట్టారు కూడా. ఇక సుంకాల సంగతి సరేసరి. కెనడా తమ పొరుగు దేశమన్న ఇంగితం లేకుండా, తమ అతి పెద్ద వాణిజ్య భాగస్వామి అనే స్పృహ లేకుండా భారీ సుంకాల విధింపునకు సిద్ధమైన ట్రంప్ వైఖరి కెనడా దేశీయులకు కంటగింపుగా మారింది. అమెరికాకు వ్యతిరేకంగా వారంతా సంఘటితమై స్వదేశీ ఉత్పత్తులనే కొనుగోలు చేయాలంటూ ఉద్యమిస్తున్నారు.

దాదాపు ఏడాదిన్నర క్రితం కెనడా ప్రధానిగా ఎన్నికైన మెక్ కార్నీ సైతం ప్రజాభీష్టానికి అనుగుణంగా అమెరికా పట్ల కఠిన వైఖరిని కనబరుస్తున్నారు. ఉభయ దేశాల మధ్య ఏళ్ల తరబడి కొనసాగుతున్న పటిష్టమైన వాణిజ్య బంధాన్ని తెంచుకోవడం వల్ల తమకే నష్టమనే విషయం తెలిసినా, తమ ప్రతినిధి బృందాన్ని మధ్యలోనే చర్చలు విరమించుకుని వెనక్కు రావలసిందిగా ఆయన ఆదేశించడాన్ని బట్టి కెనడా సార్వభౌమత్వాన్ని కాపాడుకోవాలన్న స్థిర నిర్ణయం ఆయనలో కనిపిస్తోంది.

అమెరికా- కెనడా మధ్య ఏటా 900 బిలియన్ డాలర్ల వాణిజ్యం జరుగుతున్న నేపథ్యంలో ఈ సుంకాల యుద్ధం ఇరుదేశాలకూ నష్టదాయకమే. ఆటోమొబైల్ నుంచి వ్యవసాయం వరకు, ఇంధనం నుంచి పారిశ్రామిక ఉత్పత్తుల వరకు రెండు దేశాల మధ్య సరఫరా గొలుసులు ఎంతో పటిష్టంగా ఉన్నాయి. తాజా పరిణామాల కారణంగా ఇవి తెగిపోతే ఉత్పత్తిదారులే కాదు, వినియోగదారులు కూడా నష్టపోతారు. సుంకాలతో ప్రపంచ దేశాలను లొంగదీసుకోవాలన్న ట్రంప్ వైఖరి పట్ల అమెరికన్లు సైతం సంతోషంగా లేరు. పైపెచ్చు, ట్రంప్ విధిస్తున్న భారీ సుంకాలను అక్కడి న్యాయస్థానాలు పలు సందర్భాల్లో తప్పుపట్టాయి.

ఇతర దేశాలనుంచి వసూలు చేసిన సుంకాలను వెనక్కు ఇవ్వమని ఆదేశించాయి. అంతర్జాతీయ అత్యవసర ఆర్థిక అధికారాల చట్టం అధ్యక్షుడికి విస్తృతంగా సుంకాలు విధించే అధికారాన్ని కట్టబెట్టదంటూ అమెరికా సర్వోన్నత న్యాయస్థానం కుండబద్దలు కొట్టినట్లు చెప్పినా, ట్రంప్ వైఖరిలో మార్పు రాకపోవడమే విచిత్రం. ఒక చట్టం కాదంటే మరొక చట్టాన్ని ఆసరా చేసుకుని సుంకాల వడ్డింపునకే ఆయన మొగ్గు చూపుతున్నారు. దీనివల్ల ప్రపంచ దేశాలతో అమెరికా సంబంధాలు బలహీనపడుతున్నాయి. మిత్రదేశాలపై కూడా సుంకాల కొరడా ఝళిపించడం వల్ల అమెరికా విశ్వసనీయత దెబ్బతింటోంది.

ట్రంప్ విధానాల వల్ల ఇతర దేశాలే కాదు, అమెరికా సైతం నష్టపోతోందన్న సంగతి విస్మరించరానిది. అగ్రరాజ్యంతో భారత్ వాణిజ్య చర్చలు తుది దశకు చేరుకున్న నేపథ్యంలో కెనడాతో ఆ దేశం వ్యవహరించిన తీరు మనకు ఒక హెచ్చరిక కావాలి. చర్చలు చివరి దశలో ఉండగా కొత్త షరతులు విధించారని, వాణిజ్య ఒప్పందాన్ని కుదుర్చుకునే తమ సామర్థ్యాన్ని కట్టడి చేసేందుకు ప్రయత్నించారని సాక్షాత్త్వంగా కెనడా ప్రధాని అమెరికాపై చేసిన ఆరోపణలను తేలిగ్గా కొట్టిపారేయలేం. అదే సమయంలో తమతో వాణిజ్యం నెరిపే దేశాలను ట్రంప్ ఎంత హీనంగా చూస్తారో కూడా తేటతెల్లమైంది. కెనడాతో తమకు పని లేదని, వారికే తమ అవసరం ఉందంటూ, వారు 95 శాతం వ్యాపారం తమతోనే చేస్తారన్న ట్రంప్ మాటలలో నియంతృత్వ ధోరణి కనబడుతోంది. ఒప్పందం అనేది ఉభయతారకంగా ఉండాలే తప్ప చర్చల్లో పాల్గొన్న ఎదుటి దేశం తమకు లోబడి ఉండాలన్న అమెరికా వైఖరి ఎంతమాత్రం ఆమోదయోగ్యం కాదు. అమెరికా ఫస్ట్ పేరిట ప్రపంచ దేశాలను బెదిరించడం కంటే, తమ దేశ ప్రయోజనాలను ప్రపంచ ప్రయోజనాలతో సమన్వయం చేసుకోవడం తమకూ లాభదాయకమనే వాస్తవాన్ని ట్రంప్ ఇకనైనా గుర్తించాలి.