10 ಬಾಟಲಿ ಉಪ್ಪಿನಕಾಯಿಯಿಂದ ಶುರುವಾದ ಬ್ಯುಸಿನೆಸ್: 15 ವರ್ಷಗಳಲ್ಲಿ ವಿದೇಶಗಳಲ್ಲಿಯೂ ಸದ್ದು ಮಾಡಿದ ದೇಸಿ ಮಸಾಲೆ

ನ್ಯೂ ಡೆಲ್ಹಿ, ಭಾರತ ಆಗ 25,2026 ALN: ಕೆಲಸಕ್ಕೆ ಹೋಗುವ ಮಹಿಳೆಗೆ ಪುಟ್ಟ ಮಗು ಇದ್ದರೆ ಆ ತಾಯಿಯ ಸಂಕಟ ಹೇಳ ತೀರದು. ತನ್ನ ಆಯ್ಕೆ ಮಗುವಾಗಿರಬೇಕೇ, ಕೆಲಸವಾಗಿರಬೇಕೇ ಎನ್ನುವ ನಿರ್ಧಾರಕ್ಕೆ ಬರುವುದು ಬಹಳ ಕಷ್ಟವಾಗುತ್ತದೆ. ಕೆಲಸ ಬಿಟ್ಟರೆ ಮತ್ತೆ ಅಂಥ ಕೆಲಸ ಸಿಗುವುದೇ ಗೊತ್ತಿಲ್ಲ. ಹಾಗಂತ ಕೆಲಸವನ್ನು ಆಯ್ದುಕೊಂಡರೆ ಮಗುವನ್ನು ನೋಡಿಕೊಳ್ಳುವವರು ಯಾರು? ಈಗ ಮಕ್ಕಳನ್ನು ನೋಡಿಕೊಳ್ಳುವುದಕ್ಕೆ ಲೆಕ್ಕವಿಲ್ಲದಷ್ಟು ಡೇ ಕೇರ್‌ಗಳಿವೆ. ಆದರೆ ಎಲ್ಲಾ ತಾಯಂದಿರಿಗೆ ಡೇ ಕೇರ್‌ಗಳ ಬಗ್ಗೆ ಒಂದೇ ರೀತಿಯ ಅಭಿಪ್ರಾಯ ಇರುವುದಿಲ್ಲ.

ಕೆಲಸ ಬಿಟ್ಟು ಮನೆಯಿಂದಲೇ ವ್ಯವಹಾರ

ಇಲ್ಲೊಬ್ಬ ತಾಯಿಗೆ ತನ್ನ ಪುಟ್ಟ ಮಗುವನ್ನು ಡೇ ಕೇರ್‌ನಲ್ಲಿ ಬಿಟ್ಟು ಕೆಲಸಕ್ಕೆ ಹೋಗುವುದು ಬೇಕಾಗಿರಲಿಲ್ಲ. ತನ್ನ ಮಕ್ಕಳು ತನ್ನದೇ ಕಣ್ಣಡಿಯಲ್ಲಿ ಬೆಳೆಯಬೇಕು ಎನ್ನುವ ಮಹಾದಾಸೆಯಿಂದ ಈ ತಾಯಿ ಕೆಲಸಕ್ಕೆ ಹೋಗುವ ನಿರ್ಧಾರದಿಂದ ಹಿಂದೆ ಸರಿಯುತ್ತಾರೆ. ಆದರೆ ಕೆಲಸಕ್ಕೆ ಬದಲಾಗಿ ಸಂಪಾದನೆಗೆ ಬೇರೆ ಏನಾದರೂ ಮಾಡಬೇಕಲ್ಲ. ಹೀಗೆ ಯೋಚಿಸುತ್ತಿದ್ದಾಗ ಅವರ ಮನಸ್ಸಿಗೆ ಹೊಳೆದದ್ದು ತನ್ನ ಪ್ರತಿಭೆಯನ್ನ ವ್ಯವಹಾರವಾಗಿ ಬದಲಾಯಿಸಿಕೊಳ್ಳುವ ಯೋಚನೆ. ಇವರಿಗೆ ಮೊದಲಿನಿಂದಲೂ ಅಡುಗೆ ಎಂದರೆ ಬಹಳ ಆಸಕ್ತಿ. ಹಾಗಾಗಿ ಅಡುಗೆಯ ಮೂಲಕವೇ ಹಣ ಸಂಪಾದನೆಗಗೆ ಮುಂದಾಗುತ್ತಾರೆ. ಮನೆಯಿಂದಲೇ ಏನಾದರೂ ಮಾಡಿ ಅದನ್ನು ಮಾರಾಟ ಮಾಡಬೇಕು ಎನ್ನುವ ತೀರ್ಮಾನಕ್ಕೆ ಬರುತ್ತಾರೆ. ತನ್ನದೇ ಆದ ಬ್ರಾಂಡ್‌ ಬಿಲ್ಡ್‌ ಮಾಡಲು ಮುಂದಾಗುತ್ತಾರೆ.

ಹತ್ತು ಜಾರ್‌ನಿಂದ ಆರಂಭವಾದ ಬ್ಯುಸಿನೆಸ್

ಮರಿಯಾ, ಮೊದಲು ಉಪ್ಪಿನಕಾಯಿ ಮಾಡಿ ಮಾರಲು ಮುಂದಾಗುತ್ತಾರೆ. ಹೀಗಾಗಿ ಆರಂಭದಲ್ಲಿ ಬರೀ ಹತ್ತು ಜಾರ್‌ ತೊಂಡೆಕಾಯಿ ಉಪ್ಪಿನಕಾಯಿ ಮಾಡುತ್ತಾರೆ. ಗೋವಾದ ತೊಂಡೆಕಾಯಿ ಉಪ್ಪಿನಕಾಯಿ ಎಂದರೆ ಎಲ್ಲರಿಗೂ ಇಷ್ಟ. ಆದರೆ ಇದನ್ನು ತಯಾರು ಮಾಡುವ ಪ್ರಕ್ರಿಯೆ ಬಹಳ ದೊಡ್ಡದು. ಹಾಗಾಗಿ ಅದನ್ನು ಎಲ್ಲರೂ ಮನೆಯಲ್ಲಿ ಮಾಡುವ ಕೆಲಸಕ್ಕೆ ಕೈ ಹಾಕುವುದಿಲ್ಲ. 2010ರಲ್ಲಿ ಮರಿಯಾ, ಶುರು ಮಾಡಿದ ಮೊದಲ ಬ್ಯಾಚ್‌ ಉಪ್ಪಿನಕಾಯಿ ವೇಗವಾಗಿ ಮಾರಾಟವಾಗುತ್ತದೆ. ಇದರಿಂದ ಪ್ರೇರಿತರಾದ ಅವರು ಎರಡನೇ ಬ್ಯಾಚ್‌ನ ಸಿದ್ದತೆ ಮಾಡಿಕೊಳ್ಳುತ್ತಾರೆ. ಇದು ಕೂಡಾ ನೋಡ ನೋಡುತ್ತಲೇ ಹೇಗೆ ಬಿಕರಿಯಾಗುತ್ತದೆ ಎನ್ನುವುದು ಅವರಿಗೆ ತಿಳಿಯುವುದಿಲ್ಲ.

ವಿದೇಶಗಳಲ್ಲಿಯೂ ದೇಸೀ ಮಸಾಲೆ ಸದ್ದು

ವರ್ಷಗಳು ಕಳೆಯುತ್ತಿದ್ದ ಹಾಗೆ ಇವರು ಉಪ್ಪಿನಕಾಯಿ ಮಾತ್ರವಲ್ಲದೆ ಮನೆಯಲ್ಲಿ ತಯಾರಿಸಿದ ಮಸಾಲೆ, ತೆಂಗಿನ ಎಣ್ಣೆ, ಸಾಬೂನುಗಳ ವ್ಯವಹಾರವನ್ನು ಆರಂಭಿಸುತ್ತಾರೆ. ಈ ಎಲ್ಲಾ ಪದಾರ್ಥಗಳನ್ನು ಒಮ್ಮೆ ಖರೀದಿಸಿದವರು ಪರ್ಮನೆಂಟ್‌ ಗ್ರಾಹಕರಾಗಿ ಬಿಡುತ್ತಿದ್ದರು. ಅಲ್ಲದೆ, ವಿದೇಶಗಳಿಂದ ಊರಿಗೆ ಬರುತ್ತಿದ್ದವರು ಮತ್ತೆ ವಾಪಾಸಾಗುತ್ತಿದ್ದ ವೇಳೆ ಇವರ ಬಳಿಯಿಂದ ಉಪ್ಪಿನಕಾಯಿ, ಮಸಾಲೆ, ಎಣ್ಣೆಗಳನ್ನು ತೆಗೆದುಕೊಂಡು ಹೋಗುತ್ತಿದ್ದರು.

ಗೋವಾದಲ್ಲಿ ದೇಶದ ನಾನಾ ಕಡೆಗಳಿಂದ ಬರುವ ಜನರು ನೆಲೆಸುತ್ತಾರೆ. ಆದರೆ ಗೋವಾ ಅತ್ಯಂತ ಸಣ್ಣ ರಾಜ್ಯವಾಗಿರುವುದರಿಂದ ಇಲ್ಲಿನ ಸಂಸ್ಕೃತಿಯನ್ನು ಉಳಿಸುವುದು ಕೂಡಾ ಬಹಳ ಮುಖ್ಯವಾಗಿತ್ತು. ಹಾಗಾಗಿ ಮರಿಯಾ ಅವರಿಗೆ ಎಲ್ಲಾ ರೀತಿಯ ಅಡುಗೆ ಮಾಡುವ ಪ್ರತಿಭೆ ಇದ್ದರೂ ಅವರು ಮಾತ್ರ ಅಪ್ಪಟ ಗೋವಾದ ಅಡುಗೆಗೆಯೇ ಹೆಚ್ಚು ಒತ್ತು ನೀಡುತ್ತಿದ್ದರು. ಗೋವಾದಲ್ಲಿಯೇ ಬೆಳೆಯುವ ಮಸಾಲೆ ಪದಾರ್ಥಗಳನ್ನು ಬಳಸಿಯೇ ಉಪ್ಪಿನಕಾಯಿ, ಮಸಾಲೆಗಳನ್ನು ತಯಾರು ಮಾಡುತ್ತಿದ್ದರು.

250 ಗ್ರಾಂ ಪ್ಯಾಕೇಟ್‌ಗಳಲ್ಲಿ ಮಾತ್ರ ಮಾರಾಟ

ಸಾಮಾನ್ಯವಾಗಿ ದೊಡ್ಡ ದೊಡ್ಡ ಬ್ರಾಂಡ್‌ಗಳು ನೂರಾರು ಕಿಲೋಗಳಷ್ಟು ಉಪ್ಪಿನಕಾಯಿ, ಮಸಾಲೆಗಳನ್ನು ತಯಾರು ಮಾಡುತ್ತವೆ. ಆದರೆ ಮನೆಯಲ್ಲಿಯೇ ತಯಾರಿಸುವ ಕಾರಣ ಇವರು ಬ್ಯಾಚ್‌ಗಳಲ್ಲಿ ಆಹಾರ ತಯಾರು ಮಾಡುತ್ತಿದ್ದರು. ಕೆಲವೊಮ್ಮೆ ಕೇವಲ ಒಂದೇ ಒಂದು ಉತ್ಪನ್ನವನ್ನು ತಯಾರು ಮಾಡುತ್ತಿದ್ದರು. ಸ್ವಲ್ಪ ಸ್ವಲ್ಪ ಪದಾರ್ಥಗಳನ್ನು ತಯಾರು ಮಾಡುವಾಗ ಸರಿಯಾಗಿ ಫೋಕಸ್‌ ಮಾಡಬಹುದು ಎನ್ನುವುದು ಅವರ ಅಭಿಪ್ರಾಯವಾಗಿತ್ತು. ಅಲ್ಲದೆ ಅದು ಹೆಚ್ಚು ತಾಜಾವಾಗಿಯೂ ಇರುತ್ತಿತ್ತು.

ಇವರ ಗ್ರಾಹಕರು ಇವರ ಉತ್ಪನ್ನಗಳನ್ನು ಕೊಳ್ಳುವುದಕ್ಕೆ ಯಾವಾಗಲೂ ಕ್ಯೂ ನಿಲ್ಲುತ್ತಿದ್ದರು, ಯಾಕೆಂದರೆ ಇವರು ಎಂದೂ ಕಿಲೋ ಗಟ್ಟಲೆ ಪದಾರ್ಥಗಳನ್ನು ಪ್ಯಾಕ್ ಮಾಡುತ್ತಲೇ ಇರುತ್ತಿರಲಿಲ್ಲ. ಇನ್ನು ಗ್ರಾಹಕರಿಗೆ ಯಾವುದೇ ರೀತಿಯ ಗೊಂದಲ ಆಗದೇ ಇರಲಿ ಎಂದು ಇವರು ಎಲ್ಲಾ ಪದಾರ್ಥಗಳನ್ನು 250 ಗ್ರಾಂ ಪ್ಯಾಕೇಟ್‌ಗಳಲ್ಲಿ ಮಾತ್ರ ಮಾರುತ್ತಿದ್ದರು. ಇದರ ಬೆಲೆ ಕೂಡಾ 350 ರೂ. ಎಂದು ಫಿಕ್ಸ್‌ ಮಾಡಿದ್ದರು. ಇನ್ನು ಇವರ ಮಾವಿನ ಕಾಯಿಯ ಸಿಹಿ ಉಪ್ಪಿನಕಾಯಿಗೆ ಬೇಡಿಕೆ ಹೆಚ್ಚು.

ಕೇವಲ ಹತ್ತು ಜಾರ್‌ ಉಪ್ಪಿನಕಾಯಿ ಮೂಲಕ ಆರಂಭವಾದ ಬ್ಯುಸಿನೆಸ್‌ ಇದೀಗ ಹದಿನೈದು ವರ್ಷಗಳಲ್ಲಿ ಸುಮಾರು 20 ಉತ್ಪನ್ನಗಳನ್ನು ಮಾರಾಟ ಮಾಡುವ ಹಂತಕ್ಕೆ ತಲುಪಿದೆ. ಇವೆಲ್ಲವೂ ಸಾಂಪ್ರದಾಯಿಕ ಗೋವಾದ ಅಡುಗೆಯ ರುಚಿಯನ್ನು ಹೊಂದಿದೆ.

ವಿಸ್ತರಿಸಿದ ವ್ಯವಹಾರ

ಉಪ್ಪಿನಕಾಯಿ, ಮಸಾಲೆ, ತೆಂಗಿನ ಎಣ್ಣೆಯ ಜೊತೆಗೆ ಇದೀಗ ಅವರು ಪ್ರುಟ್‌ ಜಾಮ್‌, ದ್ರಾಕ್ಷಿ ವೈನ್‌, ಚಾಕಲೇಟ್‌ ಮತ್ತು ಕಾಫಿ ಲಿಕ್ಕರ್‌, ಕೋಲ್ಡ್-ಪ್ರೊಸೆಸ್ ಸೋಪ್‌ಗಳನ್ನು ತಯಾರಿಸುತ್ತಾರೆ. ಸಿಗಡಿ ಬಾಲ್ಚಾವೊ, ಕಿಂಗ್‌ಫಿಶ್ ಮೊಲ್ಹೋ, ರೆಚೆಡೊ ಮಸಾಲಾ, ಕ್ಸಾಕುಟಿ ಮಸಾಲಾ, ಮಿಶ್ರ ಹಣ್ಣಿನ ಜಾಮ್, ಪ್ಯಾಶನ್ ಫ್ರೂಟ್, ಬಾಳೆಹಣ್ಣು ಮತ್ತು ಮಾವಿನ ಜಾಮ್, ಕೋಕಮ್ ಸ್ಕ್ವ್ಯಾಷ್ ಮತ್ತು ಮಾವಿನ ಸ್ಕ್ವ್ಯಾಷ್‌ನಂತಹ ಉತ್ಪನ್ನಗಳನ್ನು ಕೂಡಾ ತಯಾರಿಸುತ್ತಾರೆ.

ಈ ವ್ಯವಹಾರದಲ್ಲಿ ಇಡೀ ಕುಟುಂಬವೇ ಜೊತೆಯಾಗಿ ಕೆಲಸ ಮಾಡುತ್ತದೆ. ಮರಿಯಾ ಅವರ ಪತಿ ಕಂಪನಿಯೊಂದರಲ್ಕಿ ಕೆಲಸ ಮಾಡುತ್ತಾರೆ. ಆದರೆ ಕೆಲಸದ ಅಗತ್ಯಕ್ಕೆ ಅನುಗುಣವಾಗಿ ಶಿಫ್ಟ್‌ಗಳನ್ನು ಬದಲಿಸಿಕೊಳ್ಳುತ್ತಾರೆ. ಮಾತ್ರವಲ್ಲ ಆಫೀಸ್‌ನಿಂದ ಬಂದವರೇ ಅಡುಗೆ ಕಾರ್ಯದಲ್ಲಿ ಕೈ ಜೋಡಿಸುತ್ತಾರೆ.

ಇಂದು ಇವರಿಗೆ 250ಕ್ಕೂ ಹೆಚ್ಚು ರೆಗ್ಯೂಲರ್‌ ಕಸ್ಟಮರ್‌ಗಳಿದ್ದಾರೆ. 150ಕ್ಕೂ ಹೆಚ್ಚು ಮಂದಿ ವಾಟ್ಸಪ್‌ ಮೂಲಕ ಕನೆಕ್ಟ್‌ ಆಗಿರುತ್ತಾರೆ. ಗೋವಾದ ಗ್ರಾಹಕರು ಮಾತ್ರವಲ್ಲದೆ, ಯುಕೆ, ಐರ್ಲೆಂಡ್‌, ಆಸ್ಟ್ರೇಲಿಯಾ, ಜಪಾನ್‌, ಡೆನ್ಮಾರ್ಕ್‌, ಅಮೆರಿಕಾದಲ್ಲಿಯೂ ಇವರ ಗ್ರಾಹಕರಿದ್ದಾರೆ. ಇನ್ನು ಹೊರ ದೇಶಗಳಿಗೆ ದೊಡ್ಡ ಮಟ್ಟದಲ್ಲಿ ಉತ್ಪನ್ನಗಳನ್ನು ಮಾರಾಟ ಮಾಡುವ ಆಫರ್‌ ಕೂಡಾ ಇವರಿಗೆ ಬಂದಿದೆ. ಆದರೆ ಈ ಆಫರ್‌ ಅನ್ನು ಅವರು ತಳ್ಳಿಹಾಕಿದ್ದಾರೆ.